H.Novi – Abrum za Praznik mimoze (foto)

Abrumom, pozivom na učešće u predstojećoj fešti Praznika mimoze vesela povorka danas je dijelila cvijet mimoze ulicama Herceg-Novog.

Lijepo vrijeme izmamilo je brojne Novljane i njihove goste na jutarnju kafu gdje su ih dočekali žuto zeleni tonovi i cvijet mimoze. Pozivajući dođite na feštu, klovnovi i maškare prolaznicima su dijelili mimoze.

Posebno veselo bilo je na trgu „Nikole Đurkovića“, gdje se uz nastup klape Stari kapetan, abrumavalo, plesalo, pjevalo…

Kako najavljuju organizatori abrum će biti održan i sutra u jutarnjim i ranim popodnevnim satima, kada će karnevalska povorka pozivati domaće i goste, na feštu 47. Praznika mimoze, koji će biti svečano otvoren na Trgu „Nikole Đurkovića“ u petak 5. februara, prigodnim programom i koncertom Hari Mata Harija od 21 sat.

U subotu 6. februara od 11 sati je Fešta mimoze, ribe i vina duž hercegnovske rivijere, a u večernjim satima od 21 sat Maskembal u Institutu Igalo.

Na Trgu će biti postavljen karneval nazvan „Prilično Dvolični“. Tamo će stajati do kraja Praznika mimoze, 21. februara kada će biti spaljen.

Ostavite komentar

 

Komentari se na portalu objavljuju u realnom vremenu i "Boka News" se ne može smatrati odgovornim za napisano.
Zabranjen je govor mržnje, psovanje, vrijeđanje i klevetanje. Takav sadržaj će biti izbrisan čim bude primijećen, a autori mogu biti prijavljeni nadležnim institucijama.